Navro’z yangilanish, yasharish, qalblarga olam-olam quvonch baxsh etuvchi milliy bayramdir. Bahor fasli kirib kelishi bilan tabiat uyg’onishi, atrof muhit yashillikka burkanishi go’zal bayramni shukuhiga ulanib ketadi.
Ayni kunlarda mamlakatimizning ko’plab hududlarida Navro’z bayrami keng nishonlanmoqda. Joriy yilning 19-mart kuni Sirdaryo viloyati Shirin shahrida 21-mart Navro’z bayrami munosabati bilan bayram tadbiri bo’lib o’tdi.
Bolalar musiqa va san’at maktabida o’tkazilgan bayram tadbiri doirasida “Eng yaxshi milliy urf-odatlar namoyishi”, “Eng yaxshi milliy taomlar ko’rgazmasi” kabi tanlovlar tashkil qilindi.
Shahar sektor rahbarlari ishtirok etgan mazkur bayram dasturi avvalida shahar hokimi Sarvar Sultonov so’zga chiqib, barchani Navro’z bayrami bilan tabriklab, o’zining samimiy tilaklarini bildirdi.
Shundan so’ng, “Eng yaxshi milliy urf-odatlar namoyishi”, “Eng yaxshi milliy taomlar ko’rgazmasi” tanlovlarida faol ishtirok etgan qatnashchilarga faxriy yorliq hamda esdalik sovg’alari topshirildi.
Tadbir davomida musiqiy chiqishlar, sahna ko’rinishlari, bahoriy qo’shiqlar, milliylikka yo’g’rilgan ajoyib raqslar tomoshabinlarning kayfiyatiga ko’taringkilik baxsh etdi.
Shirin shahar hokimligi Axborot xizmati
